ٹویٹس

حافظ ابن کثیرؒ نے سورۃ الاعراف آیت ۲۶ کے تحت نبی اکرم ﷺ کی دعا نقل کی ہے ’’الحمد للہ الذی کسانی ما أ و اری بہ عورتی وأتجمل بہ فی حیاتی‘‘ سب تعریفیں اللہ تعالیٰ کیلئے ہیں جس نے مجھے لباس پہنایا جس کے ساتھ میں اپنی پردہ کی جگہ کو ڈھانپتا ہوں اور اپنی زندگی میں زینت حاصل کرتا ہوں۔

’’صحیح بخاری‘‘ جمہور امت اور اہل سنت کے اسلوب کا بہترین نمونہ ہے جس کے پہلے باب ’’کتاب الایمان‘‘ میں حضرت امام بخاریؒ نے عقائد و ایمانیات اور آخری باب ’’کتاب الرد علی الجہمیۃ‘‘ میں عقائد کی تعبیرات و تشریحات بیان کی ہیں اور ان میں قرآن کریم کے ساتھ احادیث نبویہ کو بنیاد بنایا ہے۔

آج ہم معاشی و عسکری طور پر معاصر دنیا سے پیچھے ہیں اور مجموعی نظام کے حوالے سے سائنس و ٹیکنالوجی کی جدید تکنیک سے بھی محروم ہیں، لیکن الحمد للہ دنیا یہ تسلیم کرنے پر مجبور ہے کہ تمام تر محرومیوں اور پسپائی کے باوجود مسلمان اپنے دین اور ماضی سے دستبرداری قبول کرنے کیلئے تیار نہیں۔

ہم دوہرے اضطراب اور دباؤ کا شکار ہیں کہ ایک طرف صحابہ کرامؓ واہل بیت عظامؓ کی حرمت وناموس مسلمانوں کے ایمان وعقیدہ کا مسئلہ ہے، اور دوسری طرف مشرق وسطٰی کی خانہ جنگی کی صورتحال کا سامنا ہے، جبکہ اس فضا میں اسرائیل کو عرب ممالک سے تسلیم کرانے کے ایجنڈے پر مسلسل پیش قدمی ہو رہی ہے۔

نبی اکرم ﷺ کے ایک ارشاد کے مطابق سچے اور ایماندار تاجر کو جنت میں انبیاء کرامؑ کی رفاقت نصیب ہوگی۔ تاریخ بتاتی ہے کہ دیانتدارانہ تجارت اسلام کی دعوت وتبلیغ کا مستقل ذریعہ رہی ہے مگر آج تجارت میں دیانت وامانت کا اعتماد دیگرقوموں میں منتقل ہوگیا ہے اور کرپشن ہمارا تعارف بن گئی ہے۔

والد محترم حضرت سرفراز خان صفدرؒ ایک بار بخاری شریف کا مطالعہ کر رہے تھے، پوچھا گیا کہ یہ کتاب آپ چالیس سے زیادہ بار پڑھا چکے ہیں، اب بھی اس کے مطالعہ کی ضرورت ہے؟ فرمایا کہ ہر بار نئے نکات سامنے آتے ہیں اور انسان زندگی بھر اس بات کا محتاج رہتا ہے کہ اپنے علم میں اضافہ کرتا رہے۔

جب تک وطن عزیز کے قانونی تعلیم کے نصاب میں قرآن وسنت اور فقہ اسلامی کو شامل نہیں کیا جاتا تب تک آزادکشمیر کے اس کامیاب تجربہ سے فائدہ اٹھایا جا سکتا ہے کہ ضلع وتحصیل کی سطح پر جج صاحبان اور قاضی علماء جیوری کی صورت میں اکٹھے بیٹھ کر مقدمات سنتے اور باہمی مشاورت سے فیصلہ کرتے ہیں۔

’’تشکیک‘‘ آج کا سب سے بڑا فتنہ ہے۔ مغربی فکروفلسفہ سے مرعوب دانشور دینی مسائل کے حوالے سے ہمارے نوجوانوں کے ذہنوں میں شکوک پیدا کر دیتے ہیں۔ وہ علماء سے رجوع کرتے ہیں جو مناسب تیاری نہ ہونے کی وجہ سے جواب نہیں دے پاتے تو وہ یقین کی پٹڑی سے اتر کر شبہات کی دلدل میں پھنس جاتے ہیں۔

حضرت شاہ ولی اللہ دہلویؒ نے اسلام کے معاشی فلسفہ کی وضاحت کرتے ہوئے تین درجے بیان کیے ہیں (۱) ضرورت (۲) سہولت (۳) تعیش۔ فرماتے ہیں کہ ضروریات پوری کرنا تو ہماری ذمہ داری ہے، جائز حد تک سہولت فراہم کرنے میں بھی کوئی حرج نہیں ہے، لیکن تعیش ناجائز ہے اور اسلامی تعلیمات کے منافی ہے۔

بیت المقدس کو عربوں کا داخلی معاملہ قرار دے کر اسرائیل کو موجودہ حالت میں تسلیم کرنے کا مشورہ ہمارے خیال میں مغربی فکر و دانش کے اسی ایجنڈے کا حصہ ہے جس میں وہ اسلام، قرآن کریم اور جناب نبی اکرم ﷺ کی خوبیوں کا اعتراف کر کے یہ کہتے ہیں کہ یہ سب اچھا ہے مگر صرف عربوں کیلئے تھا۔

دینی تعلیم و تدریس کیلئے جہاں آن لائن ذرائع اختیار کرنا ضروری ہو گیا ہے وہاں دینی مراکز کی طرف سے فیس سسٹم کی بنیاد پر مختصر دورانیے کے کورسز بھی پذیرائی حاصل کرتے نظر آرہے ہیں۔ چنانچہ متوقع حالات میں دینی اداروں کو اپنے روایتی نظم میں اس نوعیت کی تبدیلیوں کی گنجائش رکھنی چاہئے۔

اسلام حقوق اللہ اور حقوق العباد دونوں کا لحاظ رکھتے ہوئے رہبانیت اور دنیاپرستی کی دو انتہاؤں کے درمیان اعتدال اور توازن کا فلسفہ پیش کرتاہے۔ جبکہ اعتدال پسندی اور روشن خیالی کی اصطلاحات کو اب جس نئے مفہوم میں متعارف کرایا جارہا ہے ’’کلمۃ حق ارید بہا الباطل‘‘ کی ایک صورت لگتی ہے۔

حضرت عثمانؓ کی دولت اسلام اور مسلمانوں کے کام آئی، جہاد میں صرف ہوئی اور معاشرہ کے نادار افراد پر خرچ ہوئی۔ انکی شہادت کے بعد ایک ساتھی نے کہا کہ میں یہ اندازہ نہیں کر سکتا کہ حضرت عثمانؓ کی زندگی کے دن زیادہ تھے (۸۳ سال) یا وہ غلام جو انہوں نے خرید کر اللہ کی رضا کیلئے آزاد کیے۔

حضرت ابوبکر صدیقؓ نے اپنے اڑھائی سالہ دور حکومت میں تین بڑے کام کیے: (۱) عقیدۂ ختم نبوت کا تحفظ کرتے ہوئے مدعیان نبوت کی سرکوبی کی (۲) زکٰوۃ کے منکرین کا استیصال کر کے ایک دینی فریضہ کا تحفظ کیا (۳) قرآن کریم کو کتابی شکل میں جمع کروا کے اسے امت کیلئے رہتی دنیا تک محفوظ کر دیا۔

دستور پاکستان کی بالادستی اور عملداری کے مطالبہ پر سنجیدہ توجہ دینے کی بجائے اس سے بے اعتنائی کا تسلسل برقرار رکھنے کی روش زیادہ پریشان کن ہے جو پس پردہ عوامل کے حد سے زیادہ طاقتور ہونے کی غمازی کرتا ہے ؎ ’’کچھ علاج ان کا بھی اے چارہ گراں ہے کہ نہیں؟‘‘

ہر کارکن کو دین کے کسی خاص شعبے کا انتخاب کرکے اس پر توجہ مرکوز کرنی چاہیئے کیونکہ ہر کام کرنے یا بہت سے کام کرنے کی کوشش سے محنت بکھر کر رہ جاتی ہے۔ اور اگر دین کے دیگر شعبوں میں سلیقہ سے کام کرنے والوں کو اخلاقی، مالی اور عملی سپورٹ مہیا کر دی جائے تو اس کا فائدہ زیادہ ہوتا ہے۔

جب امیرالمؤمنین حضرت عمر بن عبد العزیزؒ نے احادیث کو سرکاری طور پر محفوظ کرنے کیلئے صوبوں کے عمّال کو ہدایات جاری کیں تو مدینہ منورہ کے قاضی کو لکھا کہ حضرت عمرہؒ کے علوم و روایات کو جمع و محفوظ کرنے کا خصوصی اہتمام کیا جائے کیونکہ وہ ام المؤمنین حضرت عائشہؓ کے علوم کی وارث ہیں۔

پہلی دستورساز اسمبلی میں قرارداد مقاصد پیش کرتے ہوئے وزیراعظم لیاقت علی خانؒ نے کہا کہ قائد اعظمؒ نے اس مسئلہ پر اپنے جذبات کا متعدد بار اظہار کیا اور قوم نے ان کی تائید غیرمبہم الفاظ میں کی کہ برصغیر کے مسلمان اپنی زندگی کی تعمیر اسلامی تعلیمات و روایات کے مطابق کرنا چاہتے ہیں۔

قاضی اوقصؒ بتاتے ہیں کہ میری ماں نے بچپن میں مجھے سمجھایا کہ اللہ تعالیٰ نے تمہیں شکل و صورت اور جسمانی ساخت ایسی دی ہے کہ شاید کوئی تمہارے پاس بیٹھنا بھی گوارا نہ کرے، اس لیے تم علم دین کے حصول کیلئے محنت کرو کیونکہ علم ایسی دولت ہے جو سارے عیوب اور کمزوریوں پر پردہ ڈال دیتی ہے۔

ہم نے قیام پاکستان کے بعد اپنی قومی شناخت کیلئے اسلام اور جمہوریت دونوں کو بنیاد بنایا تھا۔ اس خوبصورت توازن کے ساتھ کہ حکومت کی تشکیل عوام کے ووٹوں سے ہو گی اور وہ ملکی نظام کے حوالے سے قرآن و سنت کی پابند ہو گی۔ مگر افسوس کہ نہ ہم اسلام کے ساتھ مخلص رہے اور نہ جمہوریت کے ساتھ۔

ترمذی شریف کی روایت ہے کہ سفر معراج میں حضرت ابراہیم علیہ السلام نے آنحضرت ﷺ سے فرمایا کہ ’’آپ میری طرف سے اپنی امت کوسلام کہنا اور بتانا کہ جنت کی زمین بہت پاکیزہ، عمدہ پانی والی اور صاف میدان ہے، اسکی شجرکاری سبحان اللہ، الحمد للہ، لا الہ الا اللہ واللہ اکبر کہنے سے ہوتی ہے۔‘‘

دنیا میں اسوقت کوئی معاشرہ اسلامی اقدار وروایات کی مکمل عملداری کا عکاس نہیں ہے، بلکہ صحیح اسلامی معاشرہ صرف کتابوں اور علمی و نظری بحثوں میں ہے۔ جبکہ علاقائی ثقافتوں کو ختم کرنے کیلئے مغربی کلچر آگے بڑھ رہا ہے، وہ نہ صرف عملی ڈھانچے کے ساتھ منظم ہے بلکہ اسکی پشت پر طاقت بھی ہے۔

ہم رسول اللہ صلی اللہ علیہ وسلم کا تذکرہ نسبت و محبت کے اظہار کیلئے کرتے ہیں، رحمتوں اور برکتوں کے نزول کیلئے کرتے ہیں، اجر و ثواب کے حصول کیلئے کرتے ہیں، اللہ تعالٰی کی رضا حاصل کرنے کیلئے کرتے ہیں۔ مگر سب سے اہم پہلو جو ہماری نگاہوں سے اکثر اوجھل رہتا ہے وہ رہنمائی کا پہلو ہے۔

مکالمہ بین المذاہب کا ایک دائرہ یہ ہے کہ مختلف مذاہب کے پیروکار باہم گفتگو کریں اور دلیل و منطق کے ساتھ اپنے اپنے مذہب کی حقانیت ثابت کرنے کی کوشش کریں۔ یہ مناظرے کا میدان ہے، اسے قرآن کریم نے ’’مجادلہ‘‘ قرار دے کر ہدایت کی ہے کہ اگر یہ نوبت آ جائے تو اسے احسن طریقے سے انجام دو۔