ٹویٹس

وفاقی شرعی عدالت نے سودی نظام کے حوالے سے اسٹیٹ بینک آف پاکستان کی درخواست مسترد کر دی ہے جسکا اصولی طور پر خیرمقدم ہی کیا کیا جائیگا، مگر مسلسل ٹال مٹول اور تاخیری حربوں نے بے اعتمادی کی جو فضا بنا دی ہے اس میں یہ خیرمقدم بھی تکلف لگتا ہے، کیا معزز عدالت اس پر بھی غور کر سکے گی؟

اسلامی جمہوریہ پاکستان کی حقیقی منزل (۱) بیرونی مداخلت سے آزادی، (۲) معاشی خودمختاری، اور (۳) دستور کی بالادستی و عملداری ہے۔ اس کے لیے جدوجہد کسی بھی فورم اور عنوان سے ہو، ہر محب وطن پاکستانی کو اس کا ساتھ دینا چاہئے۔

کرونا کے پھیلاؤ کا دوسرا راؤنڈ جس طرح تشویشناک بتایا جا رہا ہے اسے ہلکا سمجھ کر نظرانداز کرنا درست نہیں ہے۔ البتہ اس کی وجہ سے کاروبار زندگی معطل کر دینا بھی ٹھیک نہیں، احتیاطی تدابیر کے ساتھ معمولات زندگی جاری رکھتے ہوئے اللہ تعالیٰ کی بارگاہ میں خصوصی دعاؤں کا اہتمام ضروری ہے۔

مولانا فضل الرحمان کی جدوجہد کا اولین مقصد دستور کی بالادستی اور عملداری کو یقینی بنانے کے ساتھ ساتھ قومی سیاست میں علماء کرام کے متحرک کردار کا تسلسل قائم رکھنا بھی ہے۔ اور یہ وہ ملی ضرورت ہے جس کا دینی حلقوں کو ہر وقت ادراک و احساس رہنا چاہیے۔

سودی نظام کے خاتمے کی جدوجہد دستوری تقاضا ہونے کے باوجود مسلسل کنفیوژن کا شکار ہے، اسی سے دستور کے دیگر شرعی تقاضوں کا حال معلوم کیا جا سکتا ہے اور ہمارے ہاں دستور کی بالادستی اور عملداری کی اہمیت کا صحیح طور پر اندازہ ہوتا ہے جو ہم سب کے لیے لمحہ فکریہ ہے۔

کرونا کی دوسری لہر بھی کم تشویشناک نہیں ہے مگر باقی تمام شعبوں میں مناسب ایس او پیز کے ساتھ معمولات زندگی جاری رکھتے ہوئے صرف تعلیم کے شعبے کو معطل کر دینا قابلِ فہم نہیں ہے اور تعلیم کی اہمیت کو کم کرنے کے مترادف ہے جس پر بہرحال نظرثانی کی ضرورت ہے اور اس پر سنجیدہ توجہ درکار ہے۔

اسرائیل کو تسلیم کرنے کی بات بار بار چھیڑنے کا مقصد مسلمانوں کے جذبات کی شدت کو کم کرنے کے سوا کچھ نہیں ہے، مگر موجودہ صورتحال میں اسے تسلیم کرنا امتِ مسلمہ کے اجتماعی موقف سے دستبردار ہونے کے مترادف ہو گا اور فلسطینیوں سے بے وفائی ہو گی۔

وفاقی وزیر انسانی حقوق محترمہ شیریں مزاری نے یہ کہہ کر ملت کے جذبات کی ترجمانی کی ہے کہ مغرب آزادی رائے کے نام پر منافقت کر رہا ہے، اسے فرانس کے صدر کی توہین برداشت نہیں ہے مگر رسول اللہ صلی اللہ علیہ وسلم کی اہانت کو آزادیٔ رائے قرار دیا جا رہا ہے۔

علامہ خادم حسین رضویؒ کا تاریخی جنازہ پاکستانی عوام کے والہانہ عشقِ رسولؐ کی علامت ہے، تحفظِ ختمِ نبوت و ناموسِ رسالتؐ کے سلسلہ میں فیصلہ کن عوامی ریفرنڈم کی حیثیت رکھتا ہے، اور پاکستان کی نظریاتی شناخت کے حوالہ سے عالمی و قومی حلقوں کو اپنے طرز عمل پر نظرِثانی کی دعوت دے رہا ہے۔

علامہ خادم حسین رضوی صاحب کی وفات سب اھل دین کےلئے صدمہ کاباعث ھے انا للہ واناالیہ راجعون انہوں نے تحفظ ناموس رسالت وختم نبوت کے محاذ پر جس جرآت وحوصلہ اور صبر واستقامت کا مسلسل مظاہرہ کیا ھے وہ لائق رشک وپیروی ھے اللہ پاک جنت الفردوس میں اعلیٰ مقام سے نوازیں آمین یارب العالمین

علماء کے ۲۲ متفقہ دستوری نکات ۱۹۵۱ء اور دستور پاکستان ۱۹۷۳ء میں عوام کی حاکمیت کی بجائے اللہ تعالٰی کی حاکمیت اعلیٰ کو بنیاد بنایا گیا اور پارلیمنٹ کو قرآن و سنت کا پابند قرار دیا گیا ہے۔ یہ اگر جمہوریت ہے تو آمنا وصدقنا، مگر پاکستان کا ’’حکمران طبقہ‘‘ اسے قبول کرنے پر راضی نہیں۔

تحریک لبیک پاکستان کے کارکنوں پر تشدد قابل مذمت ہے۔ (۱) تحفظ ناموس رسالتؐ (۲) تحفظ ناموس صحابہ کرامؓ و اہل بیت عظامؓ (۳) اور دستور پاکستان کی بالادستی کی تحریکات ہماری ملی جدوجہد کا حصہ ہیں، ان کے ساتھ یک جہتی کا اظہار دینی تقاضوں میں سے ہے۔

مظلوم کشمیریوں پر بڑھتے ہوئے مظالم اور جبر و تشدد میں مسلم حکمرانوں کی بے حسی اور ہماری سیاست کاری کا حصہ بھی کم نہیں ہے۔ ہم اسے مسلمانوں اور پاکستان کا مسئلہ سمجھنے کی بجائے کشمیریوں کا مسئلہ قرار دے کر ڈیل کر رہے ہیں اور یہی سارے الجھاؤ کی جڑ ہے۔

نومنتخب امریکی صدر جوبائیڈن کا کہنا ہے کہ وہ امریکہ کا احترام بحال کرائیں گے۔ بہت اچھی بات ہے مگر اس کے ساتھ وہ اعتماد کو بھی شامل کر لیں اور اس کے لیے سابق امریکی صدور جارج واشنگٹن، تھامس جیفرسن اور ابراھام لنکن کے موقف و کردار کو مشعلِ راہ بنا لیں تو یہ کام مشکل نہیں ہے۔

فرانسیسی مصنوعات کا بائیکاٹ ہماری ملّی حمیت کا تقاضہ ہے جو محبتِ رسول صلی اللہ علیہ وسلم سے سرشار ہر مسلمان کی ذمہ داری ہے۔ مگر اس میں یہ احتیاط بھی ضروری ہے کہ کوئی غیر متعلقہ فرم بلاوجہ اس کی زد میں نہ آ جائے جیسا کہ ’’لو برانڈ بسکٹس‘‘ کے بارے میں پہلے یہ سامنے آیا کہ یہ فرانسیسی کمپنی ہے مگر اسلامی یونیورسٹی اسلام آباد اور جامعہ علوم اسلامیہ بنوری ٹاؤن کراچی کے ذمہ دار حضرات کی تحقیق میں بتایا گیا ہے کہ ایسا نہیں ہے اور اس فرم کا فرانس سے تعلق نہیں ہے۔ ایسے معاملات میں انتہائی احتیاط کی ضرورت ہے کہ غیر متعلقہ کمپنیوں کو تحقیق کے بغیر فرانسیسی تجارتی اداروں کی فہرست میں شامل کرنے سے گریز کیا جانا چاہیے۔ بہرحال غیرتِ ایمانی کا تقاضہ ہے کہ فرانسیسی تجارت کا بھرپور بائیکاٹ کر کے ایمانی جذبات کا اظہار کیا جائے اور ایسا کرنے والے مسلمان تبریک کے مستحق ہیں۔

راقم الحروف جب پنڈال میں داخل ہوا تو گوجرانوالہ کے اپنے محلہ ہی کے کچھ نوجوان مل گئے جو اپنے ٹھکانے پر لے گئے، وہاں لے جا کر بیٹھا تو حضرت مولانا جمشید صاحب اپنے مخصوص انداز میں دنیا بھر سے آئے ہوئے لاکھوں مسلمانوں سے مخاطب تھے اور یہ نکتہ سمجھا رہے تھے کہ انسانی زندگی کی گاڑی اپنے صحیح رخ پر اسی وقت چلے گی جب اسے کائنات کے خالق و مالک اور خود انسان کو تخلیق کرنے والی ذات ’’اللہ تعالیٰ‘‘ کی مرضی اور احکام کے مطابق چلایا جائے گا۔ انہوں نے اس سلسلہ میں مثال دی کہ ریل کا انجن بہت طاقتور ہے اور بہت سے ڈبوں کو کھینچ کر دوڑتا ہے لیکن وہ اتنا وزن لے کر اسی وقت دوڑے گا جب وہ اس پٹڑی پر چلے گا جو اس کے لیے بچھائی گئی ہے۔ اور اگر اسے اس پٹڑی سے ہٹ کر چلانے کی کوشش کی جائے گی تو وہ اپنا کام سرانجام نہیں دے سکے گا۔ اسی طرح انسانی زندگی بھی اللہ تعالیٰ کے مقرر کردہ خطوط پر اسی کے پیغمبر صلی اللہ علیہ وسلم کی ہدایات کے مطابق چلے گی تو کامیابی کے ساتھ اپنی منزل کو پہنچے گی اور اگر اللہ تعالیٰ اور اس کے رسول کی ہدایات کی پٹڑی سے اتار کر اسے چلایا جائے گا تو فساد اور خرابی کے سوا کوئی نتیجہ برآمد نہیں ہوگا۔ (روزنامہ اوصاف، اسلام آباد ۔ ۱۷ نومبر ۱۹۹۹ء)

جدید علوم اور سائنسی تحقیقات کسی ایک مقام پر رکنے والی چیز نہیں ہے، اس کے نتائج آج سے ایک صدی قبل اور تھے، نصف صدی قبل اس سے مختلف ہو گئے تھے، آج ان سے بھی مختلف ہیں، اور آج سے نصف صدی بعد ان میں اور زیادہ فرق نمودار ہو چکا ہوگا۔ جبکہ وحی اپنے ایمانی حقائق اور بنیادی اخلاقیات کے حوالہ سے جس موقف پر دو ہزار سال قبل قائم تھی آج بھی اسی پر قائم ہے اور اب سے دو ہزار سال بعد بھی اس کا موقف وہی ہوگا۔ اس لیے اسے دن بدن نئے رخ اور مختلف نتائج سے روشناس ہونے والے جدید علوم کے تابع نہیں کیا جا سکتا۔ اس کشمکش میں تو جدید علوم کو ہی بالآخر وحی الٰہی کی بالادستی کے سامنے جھکنا ہوگا کہ دونوں کا فطری مقام یہی ہے۔

ناموس رسالتؐ کے تحفظ کی جدوجہد کا اصل محاذ بین الاقوامی ادارے ہیں کہ توہین رسالت کو ان سے جرم قرار دلوایا جائے۔ جس کی بنیادی ضرورت عالمی سطح پر بریفنگ، لابنگ اور ذہن سازی ہے، مگر اس کے لیے سرکاری یا پرائیویٹ طور پر کوئی فورم متحرک دکھائی نہیں دیتا اور یہی ہماری اصل پرابلم ہے۔

تاریخ کے ایک اسکالر نے سوال کیا ہے کہ حالات کو کسی شیخ الہندؒ کی تلاش ہے تاخیر کیوں ہو رہی ہے؟ عرض کیا کہ ہو سکتا ہے کوئی شیخ الہندؒ کسی مولانا محمد علی جوہرؒ، مولانا ابو الکلام آزادؒ، مولانا عبید اللہ سندھیؒ، مولانا ظفر علی خانؒ، حکیم اجمل خانؒ، اور ڈاکٹر انصاریؒ کے انتظار میں ہو کہ سفر قافلہ مکمل ہونے پر ہی شروع ہوتا ہے۔ آج نہ صرف پاکستان کو بلکہ عالمِ اسلام اور امتِ مسلمہ کو اس قافلہ کے کردار کی ایک بار پھر ضرورت ہے، خدا کرے کہ ہمیں جلد یہ منظر دیکھنا نصیب ہو، آمین یا رب العالمین۔

جناب سرور کائنات صلی اللہ علیہ وسلم کی ولادت باسعادت کے حوالے سے ۱۲ ربیع الاول کو دنیا بھر کے مسلمانوں نے اپنے اپنے انداز میں جس محبت و عقیدت کا اظہار کیا ہے وہ ہر سال ہوتا ہے اور مسلمانوں کے جذبات و محبت کو سمجھنے کے لیے کافی ہے۔ اس کے باوجود اگر مغرب یہ سمجھتا ہے کہ وہ مسلمانوں کے عقیدہ و ایمان کو متاثر کر سکتا ہے تو فی الواقع مغرب کی فکر و دانش کے سائیکالوجی ٹیسٹ کی ضرورت ہے، ورنہ مغرب اس طرح اپنا اور مسلمانوں کا وقت ضائع کرتا رہے گا۔

بوسنیا کے بحران کے دوران ایک اخباری انٹرویو میں محترمہ بے نظیر بھٹو مرحومہ نے بڑی حسرت کے ساتھ کہا تھا کہ ’’اب تو کوئی اوتومان ایمپائر (خلافت عثمانیہ) بھی نہیں ہے جس کے پاس ہم اپنے مسائل لے کر جا سکیں‘‘۔ یہ حسرت دن بدن بڑھتی جا رہی ہے اور خلافتِ اسلامیہ کی ضرورت و اہمیت کا بڑھتا ہوا احساس عالمِ اسلام کی دینی و علمی قیادتوں سے اپنی ترجیحات پر نظرثانی کا تقاضا کر رہا ہے۔

دارالعلوم زبیریہ دیر کالونی پشاور میں مولانا رحیم اللہ حقانی کے درس مشکوٰۃ کے دوران بم دھماکہ بدترین دہشت گردی ہے، اس کی جس قدر مذمت کی جائے کم ہے۔ پس پردہ اس قسم کی مذموم حرکتیں کرنے والے ملک و قوم کے دشمن ہیں، ان کو بے نقاب کر کے قانون کی زد میں لانا ریاستی اداروں کی ذمہ داری ہے۔ اللہ تعالیٰ شہداء کو جنت الفردوس میں اعلیٰ مقام سے نوازیں، خاندانوں کو صبر جمیل عطا فرمائیں، اور ان بدترین دشمنوں کی حرکات سے ملک و قوم کی حفاظت فرمائیں، آمین یا رب العالمین۔

ترک صدر جناب رجب اردوان نے فرانسیسی صدر کے بارے میں جو بات کہی وہ مغرب کو برداشت نہیں ہوئی، مگر دنیا بھر کے تمام مسلمانوں سے تقاضہ کیا جا رہا ہے کہ حضرات انبیاء کرام علیہم السلام بالخصوص سرور کائنات صلی اللہ علیہ وسلم کے بارے میں مغرب جو کچھ کہتا پھرے اسے اس کا حق سمجھ کر نہ صرف برداشت کیا جائے بلکہ اس کی ہاں میں ہاں بھی ملائی جائے۔ یہ مغربی فکر و دانش کا ’’نقطۂ عروج‘‘ ہے۔ فیا للعجب و یا للاسف۔

جناب نبی کریم صلی اللہ علیہ وسلم کی سیرت طیبہ کا جس پہلو سے بھی تذکرہ کیا جائے باعثِ برکت و سعادت ہے۔ مگر انسانی معاشرے کی ضروریات و مشکلات کو سامنے رکھ کر سیرتِ مبارکہ سے راہنمائی حاصل کرنا اور شخصی، خاندانی اور معاشرتی مسائل کا حل تلاش کرنا ہماری سب سے بڑی ضرورت ہے جس پر خاص توجہ درکار ہے۔