ٹویٹس

پاکستان کا قیام رمضان المبارک کے دوران عمل میں آیا تھا اور مسلم تہذیب و ثقافت کے تحفظ کے ساتھ ساتھ قرآن و سنت کے احکام و قوانین کی عملداری اس نئے ملک کے وجود میں لائے جانے کا بنیادی مقصد تھا، جو ابھی تک تشنہ تکمیل ہے اور ہم سب سے تجدید عہد اور عزم نو کا تقاضا کر رہا ہے۔

اسلامی جمہوریہ پاکستان کی سول سوسائٹی اور رائے عامہ کو اپنے آزادانہ اور جمہوری فیصلوں میں اسی قسم کی درپردہ سازشوں کا مسلسل سامنا رہتا ہے جن کا تذکرہ قرآن کریم نے آخری سورۃ میں فرمایا ہے۔ ان سے ہر وقت چوکنا رہنے کی ضرورت ہے، اللہ پاک توفیق عطا فرمائیں، آمین یا رب العالمین۔

رمضان المبارک کا آخری جمعہ اور عید الفطر ہماری دینی و قومی اجتماعیت کے عروج کے دن ہوتے ہیں جو کرونا بحران کے ماحول میں آ رہے ہیں اور یقیناً سخت آزمائش کا مرحلہ ہیں۔ اللہ تعالٰی ہم سب کو صبر احتیاط اور حوصلے کے ساتھ اس آزمائش میں سرخروئی نصیب فرمائیں، آمین یا رب العالمین۔

رمضان المبارک کا آخری عشرہ شروع ہو گیا ہے اور کرونا بحران میں شدت کی بات بھی ہو رہی ہے۔ استغفار، دعا، توبہ اور مکمل احتیاط کے ساتھ اس بحران سے گزرنے کی ضرورت ہے۔ اصل فیصلہ اللہ تعالٰی نے ہی کرنا ہے، اسے راضی کرنے کی جتنی بھی کوشش ہو سکے اس اہتمام کرنا چاہیے۔

وفاقی کابینہ نے قادیانیوں کو دستوری فیصلہ تسلیم کیے بغیر قومی اقلیتی کمیشن میں شامل کرنے سے انکار کر دیا ہے، جس کا پنجاب اسمبلی نے متفقہ قرارداد کے ذریعے خیرمقدم کیا ہے۔ یہ دونوں باتیں خوش آئند اور قومی جذبات کی آئینہ دار ہیں۔ مگر دوسری طرف وفاقی کابینہ کے مذکورہ فیصلے کے خلاف اسلام آباد ہائیکورٹ میں رٹ دائر کر دی گئی ہے جس کے قابل سماعت ہونے یا نہ ہونے کا فیصلہ چار جون کو ہو گا۔ اس کا مطلب ہے کہ بات ختم نہیں ہوئی بلکہ ایک نئے معرکے کا آغاز کر دیا گیا ہے جو عقیدۂ ختم نبوت کے تحفظ کے لیے محنت کرنے والوں کے لیے لمحۂ فکریہ ہے اور سب کو مل جل کر حسب سابق ایمانی جذبات کے ساتھ دلیل، حوصلہ، تدبر، حکمت اور باہمی ہم آہنگی کے ساتھ اس معرکہ میں اپنا اپنا کردار ادا کرنے کے لیے تیار ہو جانا چاہیے۔

جامعہ محمدیہ اہل حدیث گوجرانوالہ کے شیخ الحدیث حضرت مولانا عبد الحمید ہزاروی کی وفات سب اہل دین کے لیے صدمہ کی بات ہے، انا للہ و انا الیہ راجعون۔ وہ بزرگ عالم دین اور مشفق راہنما تھے، ساری زندگی قرآن و حدیث کی تعلیم و تدریس میں گزاری، اللہ تعالٰی مغفرت فرمائیں اور سب متعلقین کو صبر دیں، آمین۔

وزیر داخلہ سید اعجاز شاہ صاحب کا یہ کہنا کہ محلہ کا ایک شخص عید کی نماز پڑھنے چلا جائے تو سب کی طرف سے نماز ہو جاتی ہے، صرف ان کی دین سے لاعلمی کی دلیل نہیں بلکہ اسلامی جمہوریہ پاکستان کے لیے المیہ بھی ہے، مگر شکوہ کس سے کریں؟ بقول کسے ’’ایں چنیں ارکان دولت ملک را ویراں کنند‘‘۔

ظفر آدمی اس کو نہ جانئے گا۔ ہو وہ کیسا ہی صاحب فہم و ذکاء۔ جسے عیش میں یادِ خدا نہ رہی ۔ جسے طیش میں خوف خدا نہ رہا۔ (بہادر شاہ ظفر مرحوم و مغفور)

آج چار مئی ہے، ٹیپو سلطانؒ کا یوم شہادت، جنہوں نے جنوبی ایشیا میں انگریزوں کے بڑھتے ہوئے قدموں کو روکنے کے لیے جہاد کا پرچم بلند کیا اور لڑتے لڑتے جان دے دی۔ مگر آج کی نوجوان نسل اس سے واقف نہیں جو یقیناً ہماری اجتماعی کوتاہی ہے، ہمیں اس کی تلافی کے لیے بہرحال کردار ادا کرنا ہو گا۔

کوئی صاحب علامہ زاہد الراشدی گوجرانوالہ کے نام الگ ٹویٹ اکاؤنٹ چلا رہے ہیں اور خود ساختہ تحریریں میرے نام سے جاری کر رہے ہیں، جو شرعاً، اخلاقاً اور قانوناً ہر لحاظ سے غلط حرکت ہے۔ میں اس کی تحریروں سے براءت کا اعلان کرتا ہوں، ان صاحب کو اس حرکت سے باز آنا چاہیے، ورنہ قانونی کاروائی ہو گی۔

قادیانیت کے بارے میں علامہ اقبال نے فرمایا تھا کہ وہ یہودیت کا چربہ ہے۔ جس کا ایک پہلو یہ ہے کہ وہ ریاستی اداروں کی کمین گاہوں میں بیٹھ کر خفیہ کاروائیوں کا طریق کار رکھتے ہیں، جبکہ سیکولر لابیوں کی تکنیک بھی یہی ہے۔ جو اہل دین کے لیے لمحۂ فکریہ ہے، اللہ تعالٰی راہ حق میں استقامت دیں، آمین۔

سیکولر حلقوں کو یہ مغالطہ ہے کہ معاشرے میں مذہب اور مذہبی ذوق و رجحان مولوی اور مسجد کا پیدا کردہ ہے، اس لیے ان کو کارنر کرنے سے مذہب ختم ہو جائے گا۔ جبکہ مذہب انسانی فطرت کا لازمی حصہ ہے، مولوی اور مسجد اس کے اظہار کا ذریعہ ہیں، ضرورت جب تک ہے ان کا کردار بھی باقی رہے گا، ان شاء اللہ تعالٰی۔

کرونا بحران قابو میں آتا دکھائی نہیں دے رہا، میڈیا اس کی ذمہ داری مسجد پر ڈال رہا ہے، اور میڈیا کے بارے میں مولانا طارق جمیل کی شکایت بھی بیجا نہیں ہے۔ کیا ایوان صدر میڈیا اور مسجد کے درمیان ہم آہنگی اور اشتراک عمل کے اہم تقاضے کے لیے کوئی کردار ادا نہیں کر سکتا؟ ایک سنجیدہ سا سوال ہے۔

ڈاکٹر صاحبان کا مطالبہ ہے کہ وبا کی شدت کی وجہ سے مساجد کے اجتماعات پر پابندی لگا دی جائے، جبکہ وزیراعظم محترم کا کہنا ہے کہ اگر ہدایات کی پابندی نہ ہوئی تو مساجد بند کی جا سکتی ہیں۔ اس لیے مساجد کو کھلا اور کسی حد تک آباد رکھنے کے لیے سرکاری ہدایات کی پابندی کا سب کو اہتمام کرنا چاہیے۔

آج اکیس اپریل ہے، شاعر مشرق و مفکر پاکستان علامہ محمد اقبال رحمۃ اللہ تعالٰی کا یوم وفات، جو ہمارے قومی محسن ہیں۔ مگر ہم شاید اس لیے ان کو بھول جانے کی کوشش کر رہے کہ وہ خدا کا نام لیتے تھے اور محبت رسول صلی اللّٰہ علیہ وسلم کا درس دیتے تھے، اللہ تعالٰی انہیں جنت میں اعلی مقام عطا فرمائیں، آمین۔

یہ وقت ایک دوسرے کو کو کوسنے اور طعنے دینے کا نہیں، مل جل کر بحران سے خود بچنے اور دوسروں کو بچانے کا ہے۔ آگ کیسے لگی ہے اور کس نے لگائی ہے، سب کچھ اپنے وقت پر سامنے آئے گا اور قدرت کی سزا سے بچ نہیں سکے گا، ابھی آگ بجھانے پر ساری توجہ ضروری ہے۔

لاک ڈاؤن میں دو ہفتے کی توسیع کے ساتھ بعض شعبوں میں مشروط کاروبار کی اجازت دے دی گئی ہے، جو مناسب ہے۔ مسجد و عبادت اصولاً لازمی سروسز میں شامل ہیں، اگر ارباب اختیار اسے ناگزیر کاروباری شعبوں میں ہی شمار کر لیں تو یہ ان بھلائی سمجھی جائے گی اور اللہ تعالٰی راضی ہوں گے، سنجیدہ توجہ درکار ہے۔

لوگوں سے کہا جائے کہ کرونا بحران کے دوران مسجدوں میں ہجوم نہ کریں، گھروں میں نماز باجماعت کا ماحول و معمول بنائیں تو بات سمجھ میں آتی ہے، اس سے گھروں میں نماز تلاوت کے ذریعے برکت کا ماحول بھی بحال ہوگا۔ مگر مساجد میں نماز باجماعت معطل یا محدود تر کر دی جائے، مسلم معاشرے کے لیے قابل فہم نہیں ہے۔

ایک سوال ذہن میں گردش کر رہا ہے کہ کیا کرونا وائرس ظاہری اسباب میں سے ہے یا غیبی؟ جو دکھائی نہیں دیتا، کام کرتے ہوئے بھی محسوس نہیں ہوتا، اس کی کارکردگی صرف نتائج سے معلوم ہوتی ہے۔ اور کیا اس کا علاج ظاہری اسباب کے ساتھ کرنے کی ضرورت ہے یا غیبی اسباب کی طرف رجوع بھی ضروری ہے؟

آج دس اپریل کو مرکزی جامع مسجد شیرانوالہ باغ گوجرانوالہ میں جمعہ کی اذان ڈیڑھ بجے ہوگی، اردو بیان نہیں ہوگا، اذان ثانی پونے دو بجے اور اس کے بعد عربی خطبہ اور جماعت ہو گی، ان شاء اللہ تعالٰی۔ احباب وضو اور سنتوں کا اہتمام گھروں میں کریں، شکریہ۔

پرانی کہاوت ہے کسی گاؤں میں کچھ لوگ ایک منہ زور بیل کو خصی کرنا چاہتے تھے مگر وہ قابو نہیں آ رہا تھا۔ ایک دن وہ کنویں میں گر کر پھنس گیا اور لوگ اسے نکالنے کے لیے جمع ہوئے تو ایک ستم ظریف نے آواز لگائی یہ موقع ہے خصی کر لو۔ ہمارے دینی حلقے آج کل اسی صورتحال سے دوچار نظر آ رہے ہیں، اللہ حفاظت فرمائے، آمین۔

نبی کریم صلی اللہ علیہ وسلم نے صدقہ کی بہترین صورت یہ بیان کی ہے کہ بائیں ہاتھ کو پتہ نہ چلے کہ دائیں نے کہا خرچ کیا ہے۔ اس لیے کسی مستحق کی مدد کرتے وقت اس کی عزت نفس کا خیال کرتے ہوئے نمائش اور تشہیر سے جس قدر گریز کیا جائے بہتر ہے۔ اللہ تعالٰی قبولیت سے نوازیں، آمین ثم آمین یا رب العالمین۔

اس بڑے دنگل کا کامیاب تجربہ اس سے قبل الجزائر میں کیا جا چکا ہے جس میں ایک لاکھ کے لگ بھگ شہری لقمہ اجل بنے تہے۔ یہ ہماری مجموعی دینی قیادت کے لیے بڑی آزمائش کا مرحلہ ہے، اللہ تعالٰی حوصلہ بصیرت اور استقامت سے نوازیں آمین یا رب العالمین۔

پنجاب حکومت کی طرف سے کوئی واضح اعلان نہ ہونے کی وجہ سے نماز جمعہ کی ادائیگی کے حوالے سے صوبہ بھر کے لوگ تذبذب کا شکار ہیں۔ وزیر اعلیٰ پنجاب سے درخواست ہے کہ دوٹوک پالیسی کا اعلان کریں۔